شخابيط ع الحيط ..9

شخابيط ع الحيط ..9



يا طالع الشجرة ..
من زمن سايبة هناك فكرة ..
و أمل و حنين و ذكرى ..
و روح مشتاقة لأحلى بكرا ..
وصيتك الأمل و خليك حنين ع الذكرى




حاجات و محتاجات ..
رايحة و جاية ..
وعاملة جلبّة و هي معدية ..
و لا تلاقي برضوا روح واحدة مرضية ..
تكونش هي من الفرحة و الرضا معفيّة !!!




و كأنه كان إمبارح ..
لما كنت ست سنين ..
ماشية بضفرتين ..
و بأجمل إبتسامة مرسومة ع الخدين ..
و بأكبر ايدين في وش الدنيا مفتوحين ..
و دماغ مليانة أحلام ملونة أحلى من البلالين




في الحيرة دايما قلقان ..
وقاعد لروحك سَجان ..
و مصاحب اللي بحزنه دايماً غرقان ..
بتقتل جواك الإنسان ..
و مرضيتش تبقى مبدع و فنان ..
و آخرتها مستغرب روحك و زعلان



مفرفشة و منعنشة ..
و حاطة للدنيا فيونكة مدندشة ..
و بشر هايصة و مهيسة ..
ماشين يقولوا عيد سعيد يا ناس يا كويسة





آيــة

:-)

شخابيط ع الحيط ..8

شخابيط ع الحيط ..8




متقولش اتأخر أوان كلامك ..
و لا ضاع أملك و إلهامك ..
لسه باقي العمر أمامك ..
لوحة فاضية تلونها بأحلامك ...
ترسم ورده و بسمة و تسعد كل اللي يجي قدامك



ضحكة صفرا ما عرفش مالها ..
بينها و بين القلوب مقاطعة ..
و ويا النفوس متخاصمة ..
ولوجود الفرحة ممانعة ..
و إن يوم سألت مالها ..
تقولك البس نضارتك ما انا هو حلوة



مليون أمارة ..
و ميت عبارة عشان تحس بالخطر ..
مع أنه نازل فوق دماغك زي المطر ..
شكل الأمل لسه ماليك من البشر ..
و روحك دايرة تحلق هناك عند القمر ..
خدها مني هيفضل دايماً الخطر هو الخطر



حاجة واحدة دايما فيها نفسهم مظبطين ..
لازم كل فترة نزود عدد الميتين ..
بحسن نيه نفضي مكان للصفوة اللي عايشين ..
و اهو نوفر شوية هوا للميتين اللاحقين


التاريخ مليان حواديت ..
حروب قامت مابين السيد و العبيد ..
و ناس نجحت و بنت حياة من أول و جديد ..
و ناس من خير الميتين لسه لدلوقتي عايشين ..
و ناس في حالهم غلبانين ..
كتر خيرهم ع الدنيا متفرجيين

آيـة

:-)

شخابيط ع الحيط .. 7

شخابيط ع الحيط .. 7


•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••

بالمناظر مخدوعين ..
و بالشكل موهمين ..
و نسيوا انه أسيادهم كان للغنم راعيين ..
و للمهن الحرفية عاملين ..
تصدقوا انكم بجد صعبانين عليّ يا بني آدمين


"سيدنا داود كان حداداً .. سيدنا زكريا كان نجاراً .. سيدنا إيدريس كان خياطاً
و كل الرسل رعوا الغنم"

•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••

في صيوان العزا ناس مرسومين ..
وفي شرب قهوتهم منسجمين ..
و في الحكاوي منطلقين ..
أقولك أسألهم كده ...
هو الميت كان مين ؟!!؟


•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••

عـــايزة سدادت للودان ..
لكل ما هو سلبي و هدام ..
أو ممكن نجيب خيط بالألوان ..
لناس عندها طول في اللسان ..
يعني حل كده من الاتنين ..
يرح الناس العايشين


•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••

سنين فاتت ..
حلاوة أيامها تاهت فى وسط شدتها ..
وجمالها اتطفي من شدة قسوتها...
و لحد امته هتفضل دى سنتها ...
ياما نفسي أعرف ايه اخرتها


•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••

ياللي ماشي بتقول يا أرض ..
اتهدي ما اتوجد عليكي لي ند ..
و لا ترابك شاف لي زي ..
مالكش عندي غير كلمة واحدة بس ..
من كل قلبي بقولك فيك طظ


•••••••••••••••••••••• :: Ƹ̵̡Ӝ̵̨̄Ʒ :: ••••••••••••••••••••••



آيــة

:-)